Etter lag og lende må det ha freista den fyrste landnåmsmann som kom oppover Ordal til å slå seg ned her. Og gravfunni her og i grannegarden Hasleberg, provar og dette. No er det 2 bruk øvre og nedre Midbøen. Hovudbølet var sjølvsagt der oppe på bakken med vake utsyn over grenni. Ved å granska nøye, kan ein då få visse for at husi har stort sett stade på same tunet -- berre flutt plass så av og til. Såleis er stoga flutt litt lenger sud og peikar med gavlen utover bakken. Buret som til vanleg plar stå i nedre bakke næraste stoga, står her borte i tunet i front mot langveggen av stoga. Uthusbygningen er gamal, men velbygd. Når dei skal tidfeste husi så har dei nytta berre runde tal. Stoga 1900, Uthusbygning, fjøs og løde, 1800, Stabbur 1700 og eldhuset ‏(røykstoga)‏ 1600.

I stoga stort stogeskåp med 2 dynnar ‏(kjellarnedgong, no att-tetta)‏ tallerkhylle og koppehjell og 4 skuffar i iviskåpet med staseleg krune. Namni av Tov Egilson ‏(1758-1831)‏ og Gunhild Halvorsdotter ‏(1775-1847)‏ utan årstal er måla her. På ivistoga krunseng og skåp i same stil med namni deira og årstalet 1800.
I krunesengi sov Hans Nilsen Hauge ei natt, seiest det.

Den dyrka jord er 30 mål, 25 mål beite og innmark og omlag 1000 mål utmark. Til garden høyrer fiskerett og ½ Grønlidstaulen -- som er bytt millom øvre og nedre Midtbøen, ‏(2 fjøs, 2 stogehus)‏ og nytta til 1950.

Garden har vore i ætti frå 1740 då Egil Tovson vart eigar. Etter han Tov Egilson og kona Gunhild som døydde 1847.

I 1841, 29. 6. vart garden dela millom Halvor og Egil Tovsøner med 1 tn. 5 sett. på kvar. Skjønsmenn var: Jon Karlson Svanajord, Gunnar J. Kvålset og Jon og Tarjei Slettemeås.
Egil fekk det øvre og Halvor det nedre.
Det ovfagre stabburet med utskur av Karl Jonson Svanajord ‏(1786)‏ fekk Halvor med på kjøpet.

Egil d. på Midtbøen 1868 g.m. Ingebjørg Sigurdsdotter Kvåle. ‏(d. 1849)‏. Sonen Tov hadde garden eit bil, men selde det så til syskinbarnet sitt Tov Halvorson nedre Midbøen og drog til U.S.A. 1874. ‏(Fire av dei syskini til Amerika i 1870 åri)‏.

Tov Halvorson hadde no båe gardane og vart g.m. Tone Bjørgulvsdotter ‏(Storlid 175)‏ og fekk dotteri Margit. Så døydde Tov 1877 same året han vart gift -- og enka gifte seg att med brorsonen Olav O. Kvålset. -- Margit Tovsstr. g.m. Abraham Kj. Havstad 1904 fekk så øvre Midtbøen og budde der så lenge ho levde. Margit og Abraham var barnlause. Dei var godgjerande og kristelegsinna bondefolk ‏(pinsevenner)‏ som har sett djupe merke etter seg i bygdi.

Margit og Abraham overlet garden ‏(1939)‏ til dotter åt halvbror av Margit, Tone Tovsdotter nedre Midtbøen g.m. Einar Eilevson Omland ‏(Nystaul 56)‏ som er den noverande eigar av øvre Midtbøen. Kjøpesum kr. 12000.