Vråli som frå gamalt har høyrt under Hægeland, er no eige bruk, Garden ligg i ein kvæv i nordenden av Vråvatn eit stykke opp i skogen. Husi er i god stand. Stoga bygt 1901. Uthusi store og gode, bygde i 1901. Den gamle husestaden låg 50‑100 m lenger aust. -- Husi brann 1900. Eigedomen har 20 mål dyrka jord og 2000 mål skog.

Etter svartedauden heites det at det var på Vråli og Vrå at det fyrst vart hyst att i Vrådal. Mannen som bygde på Vråli, heitte Vrål.

Garden vart tidleg eige bruk og utskild frå Hægeland. I 1716 har Maren Hægeland fått garden g.m. Tallev Toreson Vråli, og han har det til 1742.

Ein son Olav d. på Vråli 1769. -- Men Vråli har på denne tid gått over til Sigrid Talleivsdotter ‏(far Tallev Eiv. Dale)‏ Ei dotter Dagne Olavsdotter g.m. Svein Ånundson ‏(Sirdøl?)‏ hadde dotteri Sigrid g.m. Tariei Ådneson.

I 1818 har Tarjei og Sigrid Sveinsdotter Vråli i si eige, og sonen Saamund får det g.m. Margit Kjetilsdotter Etter han truleg Svein Saamundson f. 1819 g. 1846 med Åse Olavsdotter Kosi. Svein og Åse m/born til U.S.A. 1859. Samstundes reiste truleg Saamund og kona.

Olav M. Mandt‑Eikland kjøpte visst mesteparten då, men det var eindel som ein av syskini til Svein Saamundson som budde i Fyresdal åtte. Jørund Eikland hadde vore ned til Hauggrend og tala med dei om kjøp og hadde vorte samd. Då han kom til Eikland, fortalde han svigerfar sin, O. M. Eikland om handelen. Då sa han. «Den handelen vi jamenn eg ha». -- Og såleis vart det. Olav M Eikland fekk heile Vråli. Dotter hans Anne g.m. Christoffer Roholt fekk det og hadde det til 1893 då Hans Eikland kjøpte det. Han var g.m. Tone Jørundsdotter Dotter deira, Hæge f. 1887 fekk det i 1916 og hadde det til 1956 då Inga g.m. Petter Wraa kjøpte det. -- Hægeland og Vråli har såleis påny same eigar.

Plassar
Stoi ‏(fråskild som eige småbruk i 1932)‏

Støylar
Veirhommen ‏(Værholmen)‏, Lauvstøyl og Nystøyl

Fråselde eigedomar
Osen ‏(Vråliosen)‏ til Ole Blom fyre 1804. Denne er på nærmare 200 mål.
Barlund og Stoiodden i 1939.

På Stoiodden blei Stoi handelslag bygd i 1912. Det var ein stor bygning med plass til forretning og styrarbustad og rom til posthus og telefonsentral.
I 2. høgdi blei det laga ein skulesal. Vråliosen skulekrins som fyrr heitte Hægeland skule, leigde skulesalen til fyrst i 1920 åri då det vart bygt eige skulehus lengre opp mot Krossli.
Stoi handelslag vart i 1926 overteke av John Eikland og Petter Wraa som kjøpte hus og tomt og dreiv Stoi landhandel til hausten 1928, då det vart selt til det nyskipa Stoi Samvirkelag.