Vestigard ligg på ein flate millom kyrkja og skulen. Jordet haller vestetter mot evja. Her er merke etter gravhaugar og det er truleg her dei fann steinøksi som er nemnt under bnr. 1.

I 1831 er det skyldelingsforretning på søndre Fjågesund. Det vart lagt fram rekvisisjon frå Gunnar Hansson om: «å fremme lovlig utbytning -- og delingsforretning over hans eiende halvdel i denne gaard.»

Trond Olavson Lia kjøpte det som no er Vestigard av Gunnar Hansson og hyste her. Trond g.m. I Gunhild Jørgensdotter Østenå. Dotter deira Ingebjørg g.m. Kristoffer Gudmundson. Kristoffer åtte halve garden, resten åtte Trond, svigerfaren. Trond g. II i 1838 med Sigrid Taraldsdotter Lundevall.

Garden kom så på handel og skifte eigarar frametter, m.a. åtte Hans og Nils Nilssøner Lundevall det. Gunnulf Åmundson Røymål som var g.m. Anne syster deira, hadde garden til 1924, då Andreas Taraldson Østenå g.m. Marie Gunnulfsdotter overtok.

No er det sonen Gunnvald som har garden. Vidde: 32 mål dyrka, utmark 1800 mål. ‏(prod. 600 mål)‏ Alle husi er nye. Stoga frå 1932 og uthuset 1926.