Garden ligg i ein bakke på solsida opp mot fjellet ‏(Ordalsåta)‏ og skal etter segni ha vori ein jordpart som ei gjente fekk i arv. Ho heitte Svanaug. Ei syster hennar Aslaug fekk eigedom lenger nord, der vart det heitande Aslaugsberg. ‏(Hasleberg)‏. Dette med namnet kan vera noko tvilsamt. O. Rygh gissar på fuglenamnet svane, men etter eldste skrivemåten av namnet kan det og tyde det sudaste jordet ‏(Suannegjorde 1593)‏. Garden er gamal. Den grensar mot Håtveitåsen i sud og aust, og i nord mot Hasleberg og i vest mot Skare og Hauge i Morgedal.

Garden vart tidleg dela i tvo ‏(1660)‏ og husi låg nesten tun i tun øvst oppi bakken, der øvre Svanajord no har huskrullen sin. Søndre garden vart flutt ned mot vegen i 1926 av Olav Kristoffersen som åtte denne parten.
Garden vart rekna halvgard ‏(1647)‏ og med skyld 3 tn. Der er ikkje oppgjeve buskap1657, kva grunnen no kan vera. Det ser ut som garden har skift eigar tidt og ofte den fyrste tidi.

Eigarar og brukarar. Torbjørn betalar arbeidskatt i 1593, Anstein heiter bonden 1609-30, Torkjel 1631-41. Stein m/hustru og pige betalar koppskatt 1645 -- med merknad «forarmet».
Toru og Oluf er nemnde husmenn under Svanajord i 1620-30. Tov Svanajord sit på ½ gard ved manntalet 1661, men ved folketelj. 1664 er Jon oppsidder 27 år.

Garden er 2 like bruk 1660 med kvar 1 ½ tn. m.b. Den eine luten har Jørgen Syftestad den andre Eivind Skeie. ‏(Effuind Skee)‏.

Ein Sivert Svanajord eig 2 7/12 tn. og Egil Tveit 5/12 tn. i garden ‏(1654-59)‏. Elles skifter eigarsmenn alt fort utover til 1700 talet. Det er Tov, Jon, Bjørn og Olav Svanajord. I 1698-99 har Olav 1 ½ tn. og Halvor 1 ½ tn., men året etter har Trond og Bergit dei same jordpartar.
Sondre er sjølveigar av 1 ½ tn. frå 1705 til 1722. Leidulv har same delen i 1745.

Hans Aslakson f. Åse 1709 g.m. Mari Ånundsdotter har så 1 ½ tn i 1747 til 54. Skifte etter Hans 5. 6. 54. Netto 292 rd. irekna jord i Svanajord 3 tn. ½ sett. m. b. for 230 rd. Enka Mari er det skifte etter 27. 11. 1765, ho er oppattgift med Tarjeir Bjørnson. Netto 332 rd. Svanajord 1 ½ tn. rekna 507 rd.

Opsund 7. 3. 1757: Opplese eit skjøte frå Torvil Hemmestveit på 1 ½ tn. i Svanajord på 278, 2,0 rd. til Tarjei Bjørnsen.
Denne Tarjeir Bjørnson er skriven for 3 1/24 tn. ‏(1757-65)‏ og får heimlel på 1 ½ tn. 27. 12. 1767 og 4. 3. 1777 1 ½ tn. Sonen Olav Tarjeison heimlar 1 ½ tn. 5. 3. 1779.

Karl Jonson Slettemeås ‏(1759-99)‏ får heimel på ¾ tn. i Svanajord 27. 2. 1778. Han var flink treskjerar og loftsbyggjar. Loftet som no står på Loupedalen er honoms arbeid. Det var oppsett for Johannes Leidulvson i 1792 ‏(J.L.S. og A.K.D. 1792)‏ som vart eigar av 1 ½ tn. 27. 2. 1789. Det fagre loftet på nedre Midbøen er og Karls verk. Det er skifte etter Karl 16. 10. 1799. ‏(Kona Ingebjørg Egilsdotter Jon ¼ år)‏. Netto 246 rd., jord i Svanajord verdsett 250 rd.

Ingebjørg Egilsdotter oppattgift med Svein Guttormson Nordgarden, Langlim. Det er skifte etter ho 18. 7. 1810 på Svanajord. Net. 107 rd. ‏(Svein har i 1808 ¾ tn. i Svanajord)‏. Irekna jord i Breidalen 6 sett. m.b. 500 rd., reide pengar 100 rd.

På sudigard Svanajord bur Leidulv Johannesson ‏(1815-21)‏ han eig 1 tn. 6 ¼ sett.
På søndre Svanajord sat Bjørn Halvorson *. Han var barnlaus og hushjelpi hans Bergit Prestårhus fekk garden av han til slutt. Ho seIde garden til Eivind S. Groven som dreiv ut all skogen, så fekk Olav Kristoffersen g.m. Bergit Halvorsdotter Haugan garden. Olav flutte ned husi ‏(1926)‏ som stod att etter brannen året fyrr – der fjøs og løde strauk med. Han kosta opp ny uthusbygning og bygde om stoga. Det utskorne stabbur er av ny dato.

Den noverande eigar Olav Tovson ‏(Svanajord 85)‏ g.m. Hæge Jensdotter Sælid kjøpte garden på tvangsauksjon 1929.