Tun i tun med midtre Heggtveit ligg dette bruket med kvitmåla stogebygning og nye uthus -- og med ein fin jordteig i breidde med vollen i Midtre.
Den dyrka jord er 25 mål og utmarki 180 mål. Garden utskild frå bnr. 1 ‏(Midtre)‏ 1833, 21. 10.

I stoga merker me oss ei fin kruneseng arbeidt av Leiv Sandsdalen og måla av Knut Mevastaul. Elles er dragkista av Olea Crøger å sjå der og ei tvislir og oksepeis etter Halvor Jørgenson, ‏(1779-1861)‏.

Gunleik Halvorson og Dagne Talleivsdotter hadde garden etter faren. Etter dei sonen Talleiv ‏(ugift)‏ som overlet garden til broren Sveinung som elles hadde både nordre Heggtveit ‏(fått med Kari Torsdotter, kona si)‏ og plassen Dale u/Kjos.
I 1930-åri vart det ordna så at Halvor Sveinungson. f. 1912 g.m. Guro Andresdotter Øverbø overtok denne eigedomen.

Her på denne garden voks han opp Halvor G.Heggtveit lærar og klokkar -- og sogemann. -- Han gav ut den vesle songboki «Lurlåt» under psevdonym Ola Nordmann. Seinare eit stort Kyrkjehistorisk verk m. a.
Han seier om ætti si: «Skulle jeg nevne noget sermerkt ved lensmand Jørgen Gunleiksens Gjuves slegt måtte det være: historisk interesser og kjærlighet til folkeminner.»

NB. På denne garden står eit gamalt, lite bur som er påbygt i nyare tid. Det skal vera eit av dei 7 buri på Heggtveit -- som bonden sette opp for døttene sine. -- Eit står endå på Ramskei -- som var plass u/garden. Døtrene kunne ikkje semjast, difor laut faren gjeva dei kvar sitt. -- ‏(Vonde-Sveinung Heggtveit ca. 1600)‏.