I buet etter Torbjørn Gudmundson ‏(d. 1844)‏ fekk Bjørgulf Olsen Brokke kjøpt ein tredel av heile Opsundgarden. Delen vart mælt ut av 3 skjønsmenn 25. 9. 1844. Skyldsett 21. juli 1845, skyld 7 daler, 30 skill.

Plassane Åse og Hadeland låg på Sudigard ‏(på øvre sida vegen)‏ og det budde endå folk her. I 1766 er det skifte etter husmann Halvor Kjetilson Åse g.m. Birgit Jensdotter Noko av plassen låg på Midtsund grunn.

Steinar Brokke hyser på Sudigard i 1847.

Bjørgulf sel til verbroren Mikkel Gunnarson Klauvreid i 1850. ‏(Lauvik 27)‏ Denne ætti har seinare sete på garden.

I 1875, 6. 9. vart det inngjenge semje millom Gunnar Mikkelson og Mikkel Gunnarson og Birgit Olavsdotter Gunnar og Mikkel seier frå seg odelen til fordel for ervingane til Birgit. Birgit er 3. kona til Mikkel som kjøpte garden av Bjørgulf. Mikkel d. 1881 og Birgit vart g. att m. Nils Pedersen. 17. 7. 1899 skriv skifteretten i buet etter Birgit og attlevande mann Nils Pedersen, ut skjøte til Torjus Sølverud g.m. Hæge Nordbø. ‏(Lauvik 57)‏. Nils fekk rett til bu på garden så lenge han levde. Han hadde og att ein del av jordet mot Midtigard. Kjøpesum kr. 16000. 27. 2. 1939 skjøte frå Hæge Sølverud til Anne Sølverud‑Moen, ‏(kr. 23500)‏.

Husi på garden er gamle, men vølte og oppussa. Det er to stogebygningar. Den eine bygt ikr. 1846, den andre 1870. Uthusi 1927.

Der er 65 mål dyrka jord, 25 mål beite og 1400 mål skog.

Kviteseid Elektrisitetsverk som vart skipa som lutlag i 1913, ligg på denne eigedomen. Vest Telemark Kraftlag overtok verket omkr. 1950 og la det ned. Det er no meininga å nytta vatnet her som kjem frå Opsundtjørnane, til kjelde for vassverket til Kviteseidbyen.

17. 7. 1923 tomti Solbakken bnr. 26 skild frå.

1. 7. 1938 tomti Heddelid bnr. 28 seld til o.r.sakf. Olav Lien.