Magnhild - ein utflytta Lundehering

Magnhild går nå i sitt 95 år, så du kan tru ho hadde mykje å fortelja frå eit langt liv. Ho vart født i Kviteseid. 4 år gamal flytte ho saman med forelda sine og eldste bror Torstein til Haugen på Svenseid. Faren Olav og mora Gunhild overtok garden. Etter kvart fekk ho 6 brødre til.

Folkeskulen gjekk ho på Svenseid, der ho hugsar lærarane Frøysnes, Bergan og Espedalen. Det var kort veg til skulen så ho reiste heim i matfriminutta. Det var dei andre elevane misunnelege på. Ho gjekk på skulen annan kvar dag. På fritida var det å arbeide på gardane. Mjølking var ho ikkje glad i, da bytte ho arbeid med veninna si Hilde. Hilde mjølka heime hjå Gunhild og Olav medan Magnhild baka brød hjå Hilde. Når det var skuronn hjå Øystein Svenseid var ho med og skor bendelen, løna var bra: 2 kr dagen.

Om hausten plukka ho bær, som blei seld til butikken. Plukka i blekkboksar med ståltrådhank. Ei god niste smaka godt med bruspulver blanda i vatn til drikke, da var Skåtebekken god å ha. Ved Suigard var det så fine bær, men det var på innmark og ikkje lov å plukke der, men det hendte freistinga blei for stor.

Det var alltid gildt å reise på besøk til besteforeldra i Kviteseid. Dit kunne ho ta båten frå Lunde eller sykle den lange vegen om Bø. Dei var gjestfrie og snille så ho hadde alltid noko med heim derifrå.

I 1937 «gjekk ho for presten». «Det var Kindingstad som var prest i Lunde da faren tok ho med til byen for at ho skulle få ny kåpe til konfirmasjonen. Butikkdama baud fram ein flott hatt som passa til, det var faren enig i.» «Du kunne vel greidd deg med bare kåpa», var storebrors kommentar. Kan hende det hadde sine fordelar å vera einaste jenta i flokken.

Etter ho var ferdig på folkeskulen gjekk ho på husmorskule på Notodden. Den kom nok godt med da ho gifta seg med Kåre Snaunes frå Kviteseid. Her dreiv dei garden som ligg på vestsida av fjorden. Mykje hardt arbeid. Bare 32 år gamal blei ho enke. Kåre drukna på fjorden. Sonen Arvid var da 10 år gamal. Magnhild dreiv da garden aleine i 10 år. Smør og fløte selde ho til meieriet. Om vinteren sparka ho over isen, om sommaren rodde ho over. Ein dag ho kom til meieriet, ropa apotekaren: «Magnhild, dette er for tungt for deg. Du kan få jobb hjå meg!» Dette takka ho ja til. Jorda på garden blei da leigd ut til prestegarden og dyra seld.

I 1965 gifta Magnhild seg med Trygve Aasgrav, som dreiv butikk ved Mannebru i Bø. Dei fekk dottera Bente. Trygve døydde etter bare 3 års ekteskap. Nå kom enda nokre harde år for Magnhild. Ho måtte overta butikkdrifta, samtidig som ho hadde eineansvar for Bente som er funksjonshemma. På juleftan, etter stengetid, reiste dei til faren og brødrene på Svenseid for «å lage jul» der. Magnhild dreiv butikken fram til 1992.

Nå bur Magnhild i ein kosleg leilighet sentralt i Bøgata, og annankvar sundag kjem Bente på besøk og da steller Magnhild middag for dei. Sjølv om Maghild på mange vis har møtt mykje motgang i livet, er ho full av gode minner og er ei livsglad og takknemleg dame.

Aasta og Dordi E.