Denne garden ligg i same lidraget som Gjelstad og Kjos og har frå gamalt namnet: Midtgarden-Gjelstad.

Garden ligg vent til i solhallet -- er vestvend og har god jord. Der husi står er jamn fin mark. Det eldste framhuset vart i si tid flutt til Heggtveit ‏(nordre)‏. Framhuset som står på garden no er omgjort og av ei onnor type -- nyare enn det fyrste. Det er no under oppussing. Stabburet har grove magataegde vegger med dreia hyrnestolpar, ellest ikkje utskurd -- frå ikr. 1800.

Der er tre gravhaugar på garden. Tidlegare er det utjamna fleire. Kishov staule ved Langesjå har høyrt til, men er ved utskifting i 1955 fråseld til N. Fr. Aall. Tangvald som i si tid var eit opprudd stykke med hus på i bytet mot Heistad og Gjelstad er utlagt til beite. Det skulle vera skrivarkaren Tang eller Tangvald som hyste her på den tid futen Florentz budde på Midtgarden. Tydingi av Kan -- ein åker på oppkanten av Nestegardshaugen i Midtgardens jord er vanskelegare. Etter det Gudve Gjelstad opplyser kan det vera så gamalt at det visar attende på «Eit gamalt Kann» -- eit grensepunkt millom to gardar.

Midtgarden er ein medels stor gard med ikr. 40 mål dyrka jord og 20 mål anna innmark og omlag 1000 mål utmark.

Midtgarden vart skild frå Gjelstad i 1803, 28. 2. Den fyrste eigaren var Hans Jørgensen, ‏(1806, 1. 12.)‏.

I 1811, 12. 11. får Florentz skjøte på 5/8 tn., og i 1821 er han skriven for 7 ½ settong. Han bur på Midtgarden saman med kona si Anna Dorothea f. Rye i fleire år. Dei eldste borni er fødde der. Men så i 1821 er han flutt til Roeid, der ætti hans har sidan halde til. Han bytte gard med Halvor Steinarson Bakås. Det er ætti etter Hans Jørgenson som har Midtgarden etter Florentz. I 1850 bur Jørgen Hansson der g.m. Kjersti Kjetilsdotter Øverland. Dotteri Kari g.m. sylvsmeden Guttorm Olavson Verpe av den kjende Askiltætti i Bø, bur på Midtgarden frå 1870. Dei har 5 born: Jørgen og Jørgen, Olav, Torhild f. 1876 ‏(flytte til Vestfold)‏ og Kjersti.

Kari døyr 1879 og året etter gifter Guttorm seg oppatt med Tone Olavsdotter Gravalid -- dotter åt Olav Hansson Tjos og Hæge Kjetilsdotter Øverland. Dei har borni: Kari og Olav.

Det var om Guttorm og Kari at stevet om Vågelian var omgjort slik:

«Vent er det i Fisketjønnlian når lauvet og graset gror --
men venare enn på Fisketjønn
når Guttorm og Kari ror».

Guttorm miste alt han åtte ved eindeil uheldige kausjonar. Etter 1889 er dotteri Torhild eigar. Til Midtgarden høyrde Kjos. Det vart seld av Guttorm til Tor Vå.

Guttorm som var faglærd og ein framifrå sylvsmed -- i lære hjå Tostrup i Christiania og hjå Sveinung Åsmundson Rønjom, var ellest ein mann med rike evner. Forutan at han bygde opp teglverket på Verpe i Bø, kunne han så og sei alt av handverk på ein gard, var m. a. skomaker og salmakar og urmakar. Han dreiv Midtgarden godt og hadde mang ei premiekyr til sals på fesjået i Seljord.

Torhild Midtgarden selde eigedomen Midtgarden m/Mevastaulskog i 1917 til Åsmund Høydal, son åt lærar Åsmund Olavson Sudgarden ‏(Søgaard)‏ og Ingebjørg Ellingsdotter Tveiten ‏(H.mo)‏ g.m. Sigrid Gregardsdotter Utabjå.

Skjøte frå Torhild 1919. 16. 12. lydande på kr. 10000.

I 1935, 5. 2. overtek Hallvard A. Høydal Midtgarden m/Mevastaul skog for kr. 7000. Fyre han hadde brørne Åsmund og Gregar sete med eigedomen etter skjøte av 20. 10. 1931.

Den 10. 4. 1955 skjøte frå Hallvard til Øystein Stråndi og Olav A. Gjersund. ‏(Tingl. 16. 4. 1955 kr. 17000)‏.