Det er eit småbruk høgt opp i heii ovanfor Tveitgardane. Tungt er det å koma til, men har ein fyrst vunne seg opp, har ein eit storfelt utsyn over skog og dal -- med glimt av snaufjell langt i aust. Her er nøgdi av sol. Husi ligg oppunder eit ufsdrag på ein liten hjell, rett mot middagsoli med ein bratt, ujamn bakke nedanfor og Rottjønnbekken forbi. Eit større oppdyrka jorde ligg på sudsida av bekken med ei høyløde.

Listaul har vore plass under østre Tveit til i 1900, 20. 7. då det vart skylddela i frå. ‏(1/9 av Tveit sine 5,84 skyldmark -- 65 øre)‏.

Det er 14 mål dyrka jord og 200 mål utmark. Stoga er gamal, men omvølt, klædt og måla 1944. Fjøset og løda er gamle, likeeins eit lite bur. Badstoga i passe fråstand er endå i bruk. Eigaren turkar korn og mel det på fossekverni i Rottjønnbekken etter gamal sedvane.

Sidan 1900 har mange vore eigarar av Listaul. Gunnar Eivindson g.m. Tone Kn. Li, Lårdal og sonen Knut åtte det nokre år. Han bytte det til seg i Kleivmorki. ‏(Kleivmorki pl. u/ø.Tveit)‏. Knut Knutson Midbøen ‏(gl. pl. under Vesterdal)‏ kjøpte det i 1909 og hadde det til 1924 då den noverande eigar Knut O. Lundeberg g.m. Bergit O. Heimdal kjøpte det.

Knut har dyrka opp plassen ‏(14 mål)‏ og stelt med husi og vore ein sjeldan flink og onnig mann. ‏(7 born)‏. I 1945 fekk han Tor Vå's premie for jorddyrking. Han bur der no mo åleine langt frå folk og ferdsel og driv med skogsarbeid. Lange tider om året bur der skogskøyrarar og hoggarar og då er det meir triveleg -- for mann er no manns gaman.