Det er truleg at det ved delingi, då loftet vart flutt av stade og til søndre Bratt-Sandland, vart byst der husi på dette bruket står i dag. Den timra løda som det står ein del av i uthusbygningen, kan gjerne vera frå den tid. I undelåven i ein stokk står innskore med trebokstavar Tof Sundresøn Giorth ‏(Tov Sundreson 1630-1720)‏.

Buskapen 1657: 1 hest, 7 kyr, 14 sauer, 4 geiter og 1 gris.

Eigarar og brukarar. Laurits Tordson heiter bonden på Nordre Bratt-Sandland 1593. Det er nok Lavrants Torson Midbøen, Seljord som åtte 38 tn. 2 mæler jord. Eivind 1609-20 «bruger og odelsmand». -- Tov 1644-53.

Ved folketeljingi 1664: «oppsidder Toff 24 år», men visstnok ikkje den same som Tov Holtan som har pant i Sandland for 1 ¾ tn. i 1641-43 og som har yrmse pantar i garden framover til 1664 for han er nok eldre. Ein Aslak Lauritzson har pant i garden 1629-41. ‏(1 ½ tn)‏ I 1660 Anders Midgarden 1 ½ tn. m.b.

Frå 1672 til 1704 er Tov oppsitjar på Sandland. Han er son til Sondre Klomset og g. 2 gonger. ‏(I Guro, barnlaus, II 1664 Åse Gunnarsdotter)‏ Han har m. a. tvo systar Aslaug g.m. Halvor Bjørge og Asgjerd g.m. Kjetil Gunnarson Dalene -- desse har pant i garden i 1660 åri 2/3 tn. -- Elles har ymse utbygdes små pantar i garden. ‏(Tjostulf Fionne, Jon Mulle, Phillif Paulie, Christian Rock. (5/12 sett.)‏
Denne Tov Sondreson er det skifte etter 12. 6. 1730. -- Han er død 90 år gamal, enka lever og dei har 8 born. Den eldste Øystein f. 1665 «svag og gammel».

Brt. 802 rd. Net. 770 rd., irekna odelsgods i Sandland 2 tn. m.b. 240 rd. i øvre Klomset 1 tn. m.b. 133 rd. I Tytegrav 1 ½ sett. 12 rd. NB. «I arvetomten Sandland har Tov Sondreson 1 tn. 5 nott. efter sk. 5. 12. 1668 -- og 2 mæler 1 nott. fra søsteren Asgjerd Sondresdotter 1696».

Etter Tov vert son hans, Sondre, sitjande med garden d. 1756 g.m. Gro Vigleiksdotter Stor-Omtveit f. 1677 d. på Sandland 1761 -- Sk. 3. 11. 1756. Brt. 466 rd. Net. 430 rd., -- irekna jord i nordre Sandland 2 tn. m.b. 350 rd. Dei. har 5 born. Vigleik den eldste «en gl. mand», Olav «langt over sine myndige år». Vigleik får heimel 11. 1. 1766. Kona åt Vigleik, Ågot Endresdotter Sandland er det sk. etter 5. 11. 1766. Netto 165 rd, irekna jord i n. Sandland 2. tn. m.b. 350 rd. ‏(Sylv 20 rd.)‏. Dei har 7 born. Øystein eldst, får heimel på 2 tn. 3. 3. 1775. Han er g.m. Margit Egilsdotter Hauge. ‏(2 born)‏.

Skifte etter Øystein 6. 10. 1797. Brt. 800 rd. Net. 800 rd. «Som er jord 2 tn. m.b. redskaber og creaturer». Vigleik Øysteinson g.m. Aslaug Sondresdotter Sandland, søndre, frå heimel 29. 8. 1797 og sit med garden framover til 1821. ‏(d. på Sandland 1837)‏.

Nordre Bratt-Sandland vert skyldsett og dela i tvo like delar ‏(1 tn. kvar)‏ 4. 12. 1827. -- Året fyrr har Halvor O. Svalastogo, Flatdal fått skjøte på nordre luten av Vigleik Øysteinson. ‏(Skjøte ting. 25. 10. 1826)‏. Halvor g.m. Åsne Sondresdotter har garden framover og sonen Sondre Halvorson g.m. Anne Endresdotter sit med garden, men har ikkje heimel sjølv. I 1877, 26. 4. sel han garden til svigerson sin Olav Tarjeisson Sandland g.m. Åsne Sondresdotter kjøpesum 8400 kr., tingl. 7. 5. 1877. Ei dotter Asgjerd g.m. Åsmund Tallevson Kolltveit overtek garden i 1890-åri. Åsmund d. 1904 og enka sat med garden til 1929 då Steinar O. Vinsvål g.m. Margit Åsmundsdotter Sandland kjøpte eigedomen.

Den noverande eigar har brote opp 16 mål og grøfta og stelt opp jordet så det gjev dobbel avling. Han har bygt heilt ny uthusbygning ‏(1940)‏ og ominnreidt stoga med kjellar og kjøkken ‏(1950)‏.

Den dyrka jord er 25 mål og 2 mål udyrka. 600 mål utmark. -- Til denne garden har ikkje høyrt gamle plassar.