Garden ligg nedom Tollehornen og like ved grensa til Seljord -- med det bratte Skogsodd rett I vest. Eit stykke fylgjer bytet bygdaråi til Ramskeistaulen der det går over elvi og vestover til plassen Nyórk og møter Kyrdalen ved Fegdetjønn. Jordet er nokså sterkt hallande ovan husi, men flatnar noko nedanfor. Slåmaskina kan gå alle stader. Den dyrka jord er 45 mål og like mykje beite og innmark og 400 mål utmark, ‏(prod. 200 mål)‏.
Stridsmoen ligg vestan elvi, med ein gravhaug. Det er segn om at der har stått eit slag millom 2 småkongar -- og dei falne vart nedgravne i haugen der.

Husi på garden er sers store og romlege -- såleis har stoga frå 1830 ialt 10 rom. Det var lensmannsgard på den tid. Steinar Halvorson g.m. Dagne Sveinungsdotter åtte garden. Den gamle stoga brann i hans tid, og den nye vart flutt lenger opp på muren, så no går det ein brei murgang nedom tverrveggen. Det var «italiendertak» fyrststundes, men i 1896 vart stoga omrausta og likeins noko ominnreid.
Stabburet er nytt -- i gamal stil -- timra av Tov Tarjeison Gjelstad og rikt utskore av Hans O. Slettemeås. ‏(1943)‏. Timra gamal løde med nytt fjøs ‏(1939)‏ -- alt under eit tak.
Sag og kvenn høyrde til nede i Bygaråi -- nedlagde lenge sidan.

Då garden vart bygd i 1790 åri var Olav Gunleikson eigar. Han budde der til sist i 1820 åri og flutte så til plassen Ramskei d. der 1834 *.

Steinar Halvorson og Dagne Sveinungsdotter ‏(Groven 17)‏ kjøpte garden i 1828. Han døydde på Heggtveit 1839. Halvor son hans 8 år, døydde på same tid og dei fylgdest til jordi.
Dagne vart oppattgift med enkem. Sveinung Eivindson Skori 1841, ‏(han 35 år gl.)‏.

I 1863 flyt Tor Gunleikson Ormbrekk til Heggtveit og året etter kom Olav Gunleikson bror hans til Ramskei. Dei kjøpte jordi av Dagne Heggtveit. Tor g.m. Gro Gunnarsdotter ‏(Svollsbru 239)‏ 1862 -- hadde garden til 1891, 13. 4. då dotteri Kari g.m. Sveinung Gunleikson overtok garden for 5000 kr.
Gunleik f. 1898 og g.m. Kjersti Gundersen overtok eigedomen etter faren 1934.

Plassar
Nyórk
Ein attlagd plass ved hovudvegen til Br.berg. Plassen er rudd av Eivind Kjetilson Øverland ikr. 1840. Han var husmann under Gjelstad og sat på Ståland -- han skulle endå verta utkasta ein joleftan og sat under ei gran og elda for seg.
Dei snakka så mykje om Amerika og Nyórk i dei dagar -- og Eivind sa: «Her sko eg laga mitt Nyórk» -- så fekk dette rudningslendet som er trongt og ulageleg nok, dette kravstore namnet. No er plassen attlagd og husi borte. Sist budde Kjersti, enka etter Anders der.

Bjelland
Høyrer no til Brekka i Seljord.

Sponmyr
Er attlagd. Sist budde ein Gunstein der.

Ramskel
Gjekk over til Olav Gunleikson Ormbrekk bror til Tor som fekk Heggtveit g.m. Gro Kvålset. Dei kjøpte det av enka etter Steinar Halvorson Heggtveit.

Kyrdalen