Langt opp i fjellsida ovanfor Vrå, ligg denne garden lognt i ein kvæv beint mot morgonsoli. Det er no bilveg dit dei 2 km frå allmannvegen. Det har vori ei skogvidde på om lag 5 000 mål og 50 mål dyrka jord. Til garden har høyrt plassane Skare, Neirbø og Undeberg og staulen Grønhovd.

Garden vart dela i 1938. Eit bureisingsbruk vart skild ifrå. Husi på hovudbølet er rivne og flutte, og garden er utlagt til beite og gror til etter kvart. Utbygdes folk har hatt garden i 30‑40 år. ‏(Olaus H. Dale.)‏

Bygggstøyl vart rekna øydegard 1647 med skyld 1 tn. 1 ½ daler. Buskapen var i 1657 1 hest, 5 kyr og 16 sauer.

Eigarar og brukarar. I 1619-20 betalar Anders saltskatt. Han er også nemnd «Anders Vrå» brukar av Byggstøyl. Etter han er Dreng, son hans, der. Ved folketelj. 1664 er Dreng 59 år med son Anders 14 år. Han skattar av 1 tn. 1647-59, seinare ½ tn. ‏(1660-71)‏. Den andre ½ tn. har Aslak Nes, Kviteseid. Jens Nilsson eig garden 1672. ‏(1 tn.)‏ Rannei Byggstøyl er odelskvinne 1665-81 med ½ tn. i Byggstøyl. Veum kyrkje eig 5 nott. 1678. Hoskuld er nemnd brukar av 19/24 tn. 1682-92. Jakob skattar av 1 tn. 1695-98. Etter han har Olav heile garden til 1704, noko seinare berre 5/24 tn. ‏(1725.)‏ Denne Olav Håvardson var frå Lista og g.m. Gro Tjøstolvsdotter Aslestad. Der er skifte etter Gro 8.11.1728. Dei har 6 born. ‏(Håvard, Tjøstolv, Ingebjørg, Sigrid, Sigvei og Sigrid d.y.)‏ Brt. 2 207 rd. Net. 1847 rd. Han eig fleire gardar m.a. Lauvvik i Tørdal 2 tn. 4 mæler, 665 rd., og Kassajord i Veum 5 ½ mæler, 220 rd. og Bygstøyl 1 tn., 300 rd.

Håvard ‏(1713-88)‏ g.m. Sigrid O. Veum har 19/24 tn. 1740-65. Han får skjøte 21.11.1753. Son hans, Olav Håvardson, overtek garden 27.4.1789 og har desse 19/24 tn. i 1808-18. Kviteseid kyrkje eig 5/24 tn., ‏(resten av garden)‏ i 1751. Det kan vera panten Veum kyrkje hadde i 1678.

Ein Håvard Gunnarson svarar landskyld av garden 1818-21. Han flyt til Moland 1823, og sonen Halvor Håvardson har garden. Han reiser til Amerika. I 1839 har versonen Jon Knutson Nordbø, vorte eigar. Det er knapt dei budde der sjølve, for i 1891 er Nils Jonsen Nordbø eigar, og då vitnar ein Gjermund H. Bygstøyl i ei markskilsak at han har vori brukar på garden i 26 år. Ånund Andresen Bygstøyl og sonen Andres Heggelid, Skafså hadde det fyre Olaus H. Dale kjøpte det.

Som fyrr nemnt vart Byggstøyl deila i 1938. Aslak Bendikson Hauge g.m. Andrea Bergedalen fekk til eit bureisingsbruk her. Byggstøyl gnr. 4, bnr. 5. Plassen Skare og noko av innmarki og 200 mål utmark fylgde med i handelen. Der er nydyrka ikr. 15 mål. Husi er bygde i 1943‑44.