På vestsida av Vråvatn ligg eit fjell som heiter Storskrea. ‑ Eit vidt synleg sva eller svouberg på fleire hundre mål med eit hall på 45 grader eller så. Innunder er ei tykksett skogli av gran og bjørk som har trassa så mangt eit snøras gjenom tidene. Det er morenejord under fjellsida. Eit godt stykke ned i lii i ei jamn hall, er Skreegarden å finna. Det var opphaveleg plass under Roholt. Den gamle husestaden, var lenger oppi bakken ‏(25 m)‏. Olav Tarjeison flutte ned husi i 1914. Stoga er gamal, men innåtbygt og påbygt. Uthusbygningen er opphaveleg den gamle, men bygt innåt ikr. 1914. Der var 2 bur, eit stort og eit lite. -- Det siste svært gamalt, med nedrive ‑ diverre. Eit kvernhus står i Skree‑elvi like ved garden. Det er eit minne frå ei bortfari tid. Kverni var oppatt fjødda under okkupasjonen og nytta noko då.

Til garden har høyrt Skretveit og Lundeberg og staulane Nystaul og Skrestaul. Samla var vel eigedomen på 7-8000 mål. Skretveit og Lundeberg er no eigne bruk, og vidare er det fråseld 2 bureisingsbruk, Åsheim ‏(1938)‏ til Sveinung Bjørnson, Kviteseid g.m. Bertine O. Skree, og Skree, nordre til Kristian O. Skree.

Dei ovannemnde staular vart nytta til 1940. ‑ Enno står setuselet på Skrestaul og ei ny hytte er oppbygd der -- men bjølleklang og kuraut og hjuringslokk har tagna her og -- som så mange stad.

Skree vart utskild frå Roholt 2.10.1766. Det var Olav Halvorson g.m. Ingebjørg Tjostolvsdotter som fekk heimel på 17/32 tn. Same dag får Halvor, truleg faren, ‏(1722-1766)‏ heimel på 1 ¾ tn. -- Vidare er Olav Skree skriven for 2/3 tn. i 1782. Olav og Ingebjørg hadde 7 born, alle f. Skree. Den som sidan vert eigar er Halvor ‏(1781-1865)‏ g.m. Ingebjørg Ivarsdotter Sonen Ivar ‏(1813-84)‏ g.m. Anne Susanne Kjetilsdotter Væting har så eigedomen. Ei dotter Ingebjørg Ivarsdotter g.m. Olav Tarjeison Skretveit, hadde garden framover. Han dyrka opp mesteparten av garden ‏(steinut jord)‏, var byggmeister og flutte og sette oppatt alle husi på garden. Ei liti skulestoge som stod ei tid ved Kloppernyr, hadde han sett opp.

I 1928 fekk han 2. premie av Tor Vås jorddyrkn.fond, 12 sylvskeier i etui. Olav var elles flink treskomakar og gjorde sko til eige bruk.

Den noverande eigar Halvor O. Skree g.m. Gunda Fjalestad overtok eigedomen 1938. Garden er no på 25 mål dyrka jord og 1500 mål skog.