Eigedomen ligg nedåt Vråvatn på ein odde rett nord for Ormtveit søndre. Bygdevegen som ligg nære vatnet, går rundt odden ende nedom husi på garden.

Husi på Nordvik er romsame. Stoga frå 1860 blei omvølt i 1922 og uthusbygningen er frå 1937. ‑ Fyrr stod det på tunet ei timra løde med låve millom høyrom og kønnrom, og fjøs og stall kvar for seg.
I 1935 brann låven frå 1922. Årsaken var barn og fyrstikker. Ny låve blei satt opp.
I 1965 brann låven frå 1937 på nytt. Årsak ukjent/elektrisk. Ny kom på plass eit par år etter.

Gard frå 1857
Garden blei deila frå Ormtveit 22.6.1857, og Torjus Tovson Ormtveit vart eigar av denne parten. Han var g.m. Kristi Sveinsdotter ‑ syster åt Gunhild Veamyrann*. Torjus kjem straks i stor skuld. Den 11.3.1861 skriv han under på eit skadedausbrev til Norges bank på 400 spdr. Det går nokre år, men det var tronge tider ‑ og garden kjem til auksjon i 23.5.1870. Broren Åvald får tilslaget på 1560 spdr. - med omkostningar kom det opp i 1775 rd. ved sluttoppgjerde 28.10.1874.
Jørund ‏(Jørgen)‏ Eivindson Eikland baud 1555 spdr. på auksjonen -- og han kom til å overtaka etter Åvald nokså snart. ‏(1872?)‏. Jørund fekk berre ½ av nordre Ormtveit. Den andre delen la Åvald innåt sitt bruk.
Torjus Tovsson med familie, bur deretter på garden som leilendingar, fram til dei døyr i 1917/1918.*

I skifte etter Jørund Eikland i 1917, fekk dottersonen Håkon Eikland garden.
Jørund som og eigde Hægeland, hadde i 1909 lagt Kleppe og Kleppeskog, ca. 500 mål og Tjønnestøylheii ca. 1500 mål til Nordvik ‏(byta samstundes namn frå Nordre Ormtveit)‏. -- No er den samla vidde omkr. 3000 mål og med 30 mål dyrka mark.

Håkon Eikland g.m. Ingebjørg Midtgarden vyrdsla godt om garden. I 1936 fekk han 1. pr. av Tor Vås jord.fond. Han eigde og noko av Kvennes skog i Kviteseid. Sonen Jørund Eikland overtok garden i 1965 og hadde den til dottera Inger Eikland Selstø overtok i 1997.

I 1965 kaupte Jørund Eikland eigedomen Svartebekk ‏(9/1)‏ som øydegard. I 1979 vart den og Tjønnstøyl, føya saman med Nordvik til eit bruk ‏(9/3)‏.

Plassar
Viki og Bakken som er delvis oppdyrka og innlemma i innmarki.
Dei siste som budde på Viki, var Hølje Jonsson Rue frå Tinn g.m. Ingebjørg Olavsdotter Vadder frå Mo. Familien budde der frå omkring 1868 til 1920.

Kleppe, Kleppskog og Bukkøy låg under Hægeland før 1909, som nemnd over. Etter 1909 budde det ikkje nokon på desse plassane, difor er omtalen av desse plassane under Hægeland.

Staular
Tjønnestøyl, Grønlid og Grasfjell ‏(opph. komne frå Hægeland)‏ har vorte nytta som støylsbruk til 1925 og som slåtte til 1936.

Frå Nordvik er seld 3 tomter. ‏(Sundvollen, Skogly og Fjell-li.)‏