Denne garden har ein gong kome frå Skare. Namnet kjem av at garden ligg ved sida av Kallåk gnr. 79.

I skifte på Skare etter Johannes Guttormson 31. 8. 1786 får Olav Johannesson denne jordparten som vart sett i ¾ tn., og hyste her. Olav d. her 1811 og sonen Johannes ‏(1795-1882)‏ g.m. Hæge Såmundsdotter bur her framover til ikr. 1827, ‏(eller litt seinare)‏.

Svein Tarjeison Omtveit skriv i dagboki si: «Den 12. mai 1828 kjøpte jeg Lille-Kallåk av Johan Olsen for 600 spdr., solgte det 1 år efter til Tor Svendsen Hovdekleiv for 700 spdr., men så måtte jeg forsørge selv Follauget Thone Olsdatter som fra den tid har vært i mit brød.»

Tor er skriven for Vesle‑Kallåk 1830-40. Det døyr 5 gutungar for han desse åri. ‏(3 Svein'ar og 2 Kjetilar.)‏

Bjørn Johannesson g.m. Ingebjørg Halvorsdotter har garden som bustad 1857-68, og er skriven som eigar i matr.lista for 1886. Etter Bjørn måtte levere frå seg garden ikr. 1890 har han gått i mange handelar. Såleis hadde Torjus Bjørgulvson Hemmestveit det ei stund. I 1905 eig Vetle Sveinson det.

I kring 1910 kjøpte Anders O. Gjersund g.m. Åsne O. Donstad det.

Anders har dyrka opp mykje jord. Det er no 35 mål dyrka jord på Vesle‑Kallåk. Elles er det 20 mål beite og skrapslått og 800 mål utmark.

Stogebygningen er frå 1953. Stabburet er timra i ny form, men er gamalt. Eldhuset er ei gamal plassestoge og oppsett her ikr. 1920. Uthusbygningen er ny.

Anders har drive som landhandlar på Odden ‏(tomt utskild frå Versto)‏ sidan 1929. Sonen Eivind overtok handelen 1955. En annan son Olav, har Vesle-Kallåk no.

Frå Vesle-Kallåk er fråselt eit større stykke. ‏(bnr. 12.)‏ Åsmund Vetleson eig dette.