Eigedomen er gått ut frå Lønnegrav i 1872 då far åt hotelleigar Johan Straand, Olav Jørgenson Godokk g.m. Kari Jonsdotter Lindestad, kjøpte det av Ådne Gunnarson Lønnegrav. Det var 3 Straandplassar, på kvar side av vegen, men husi på nedre er borte og tuftene utjamna, og på staden er bygt ein bilgarasje og verkstad. -- Eigedomen går ned mot Nisser. Det er 18 mål dyrka jord, 5 mål hamn. 200 mål av Lønnegravskogen vart tillagd ved skifte etter Johan Straand 1956.

Den opphavelege stoga på plassen er flutt høgre opp i bakken med eit innattbygg og står framleis, men uthusbygningen er bygd av Olav J. Straand i 1890 åri. Han bygde og ein stogebygning som brann ned i 1924 saman med eit stabbur. Den noverande bygning -- hotellbygningen er bygt av Johan O. Straand i 1925 og bygt om og modernisera i 1950 åri av Sigmund Straand g.m. Jorun Midtun Henriksbø. Sigmund d. 1960. Eit stabbur er bygt på den gamle tomti av det som brann.

I folketeljinga i 1865 er det 3 husmannsplassar på staden.
Brørne Tov Tarjeisson og Aavald Tarjeisson Lønnegraf bur på den eine plassen og har ein hest.
Kjetil Berntsson Straumsnes med familie bur på den andre plassen.
Olav Aanundsson Kleppskog med famile bur på den tredje plassen.

Olav Jørgenson Godok g.m. Kari Jonsdotter busette seg på ein av plassane etter at dei gifta seg i nov. 1866.
I 1872 kaupte dei Straandplassane og i folketeljinga i 1875 har dei 7 hestar og 3 kjøyrekarar som og bur her. Familien bur i dei øvre husa og leiger ut den nedre til Gunnar Kjetilsson med familie.

Straand var skyss‑stasjon i Olav Jørgenson si tid og heldt fram sidan alt til 1934. Skyssen var med hestar -- og på Straand hadde dei opptil 12 hestar til å greie både med transportkøyring og skyss til Kviteseid, Nissedal, Tørdal og Fyresdal.