I ei liti solhall eit stykke nord for skulehuset ligg dette bruket, lognt og koseleg med godt oppstelte hus. Buret har ny form oppsett 1800 med namnet J.Ø.S. ‏(Jan Øysteinson)‏. Buret er flutt frå Finnkosi av Tormod. Storleik: 16 mål dyrka jord og 70 mål utmark. Noko av den gamle attlagde plassen Dapen høyrer til.

Tormod Knutson, diktaren og stortingsmannen, budde her i lang tid, og er mest kjend under namnet Borgejorde. Borgejordet blei skilt ut frå Norigard Tveit då Tormod kjøpte eigedomen av Aslak Olavsson Heggtveit ‏(Utbøen 11)‏ for 160 Spesidaler. ‏(Tinglyst 7. august 1832.)‏ Tormod flutte dit og levde resten av levetida på Borgjordet. Død der i 1868.

Tormod vert vel omtala meir ein annan stad i denne soga.

Etter Tormod si tid, i 1869, vart eigedomen seld til Endre Gunnarson Tveit. ‏(Auksjon-skøyte tinglyst 10. mai 1869, 300 Sp.d.)‏
I 1887 overdreg Endre Borgejordet og eit skogstykke utskilt frå Nedre Lid til sonen Endre Endresson Tveit for 1600 kroner.
I 1890 reiser Endre dy til Amerika, og han sel då Borgejordet og skogstykket til broren Gunnar Endresson Tveit ‏(Skarprud)‏. ‏(Tinglyst 9. juni 1890, 3200 kroner.)‏
Frå 1899 og framover til omlag 1917 er det eldste dotter til Gunnar, Hæge, og mannen Mikkel som er brukarar av garden. Alle barna deira blir fødte på Borgejordet, og bruka seinare Borgejordet som familienamn. Hæge døydde der i 1915.
I 1917 ‏(tinglyst 15. januar, 10.000 kroner)‏ sel Gunnar Endresson Borgejordet til sonen Johannes g.m. Marie Oppsund.
Tarald Torson Skarprud g.m. Turid O. Tveit kjøpte garden i 1922 av Johannes Gunnarsson Skarprud ‏(Oppsund)‏, ‏(tingl. skjøte 14. 10. 1922, 25000 kr.)‏ Johannes var søskenbarn med både Turid og Tarald Skarprud.
Då Tarald kjøpte garden var husi mykje til nedfalls, så han har bygt nye uthus og elles gjort ymse utbetringar på garden. Tarald d. 1962.

Sonen Olav Taraldson fekk så skjøte. Han døydde i 1969 og broren Tor Taraldson Skarprud overtok. Tor døydde i 1984 og enka Anne selde garden til Erling Brauti ‏(son til Tors søskenbarn)‏ i 1984. Samtidig blir også skogeigedomen Kyrvestaul i Tokke kommune, som Tor og brørne Olav og Arne har vore eigarar av, selt til Erling Brauti.

Husa har sidan 1989 ‏(og framleis i 2016)‏ vore leigd ut til Henry Vigdeil.
Erlings son Olav Brauti tok over i 2000 og er eigar i dag ‏(2016)‏. Garden blir drive saman med Brauti, Tveit nordigard, Tveit nordjordet og Kyrvestaul.